“NAVBAHOR” GAZ TO‘LDIRISH SHAHOBCHASI AHOLI XIZMATIDA

Viloyatda suyultirilgan gaz isteʼmolchilari soni 102 617 tani tashkil etadi. Joriy yilning may oyi o‘tgan davrida viloyat bo‘yicha 770,05 tonna suyultirilgan gaz isteʼmolchilarga yetkazib berildi. Jumladan, "Navbahortumangaz” gaz taʼminoti bo‘limi tomonidan ham aholi va ulgurji isteʼmolchilar kechiktirilmay maishiy gaz ballon bilan taʼminlanib kelinmoqda.
Tumanda joylashgan "Navbahor” gaz to‘ldirish shahobchasining kunlik tarqatish quvvati 18,5 tonna bo‘lib, bu yerda har kuni gaz ballonlar ortilgan 4 ta "ISUZU” transport vositalarida aholi xonadonlariga suyultirilgan gaz yetkazib beriladi.
Gaz to‘ldirish shahobchasida ishlar tizimli tashkil etilgan. Avval, gaz ballonlari og‘ir sig‘imdan tozalanadi, keyin esa ular maxsus elektron tarozilarda 20 kilogrammdan suyultirilgan gazga to‘ldirilib, transportlarga ortiladi. Kuniga 45 tonna suyultirilgan gaz qabul qilish quvvatiga ega mazkur shahobchada ishchi-xodimlar uchun yetarli sharoitlar yaratilgan.
Navbahor tumanida suyultirilgan gazdan foydalanuvchi aholi soni 19 ming 233 nafarni tashkil etadi,- deydi "Navbahortumangaz” gaz taʼminoti bo‘limi suyultirilgan gaz xizmati boshlig‘i Yusuf Murtazoyev.- Tuman aholisiga may oyining o‘zida 142,97 tonna suyultirilgan gaz yetkazib berish rejalashtirilgan bo‘lib, oy boshidan buyon 134,08 tonna suyultirilgan gaz aholi xonadonlariga yetkazib berildi.
Aytish kerakki, gaz to‘ldirish shahobchasida faoliyatda xavfsizlik qoidalariga rioya etilishi ham qatʼiy nazorat qilib boriladi. Bu bo‘yicha ham xodimlarga tushuntirishlar berib kelinmoqda.

 
 

Агарда Сиз мақолада хатони учратган бўлсангиз, унда хато матнни белгилаб, CTRL + ENTER тугмасини босинг ва сайт маъмурига хабарнома жўнатинг.