28.12.2024

Butun yurtimiz bo‘ylab “Yangi yil bayrami” shodiyonalari davom etmoqda. Shu munosabat bilan bugun Navbahor tumanida ham poyoniga yetib borayotgan 2024- yilni kuzatib, kirib kelayotgan Yangi 2025-yilni olam-olam quvonch, yangi-yangi marralar bilan qarshi olmoqdamiz. Bayram munosabati bilan tuman markazida “Tinch diyorda shodon-u xurram, kutib olinmoqda yangi yil bayram!” nomli teatrlashtirilgan “Prezident archasi” hamda yangi yil bayram tadbiri bo‘lib o‘tdi.

Tadbir davomida bayram ishtirokchilari va ehtiyojmand oila farzandlari uchun bayram sovg‘alari taqdim etildi. Tuman hokimligi, madaniyat bo‘limi, 11-son bolalar musiqa va san’at maktabi, xalq ta’limi bo‘limi hamkorligida tashkil etilgan ushbu bayram tadbiri tumandoshlarimiz, ayniqsa, quvnoq bolajonlar, shuningdek, tumanimizga tashrif buyurgan mehmonlar bilan gavjum bo‘ldi.

Yangi yilning kirib kelishiga sanoqli kunlar qolgan mana shu hayajonli lahzalarda siz azizlarni yana bir bor kirib kelayotgan 2025-yil bilan chin qalbimizdan qutlaymiz. 2024-yilda qo‘lga kiritgan eng katta yutug‘imiz bu - yurtimizda hukm surayotgan tinchlik, osoyishtalik, barqaror iqtisodiy rivojlanish bo‘ldi. Yangi yilda ham har bir sohada yuksalishlar davom etishini, xonadonlarimizda osoyishtalik, to‘kinlik hukmron bo‘lishini tilaymiz. Yangi yilda mehr-oqibat, obodlik va farovonlik tark etmasin. Kirib kelayotgan yangi 2025-yilingiz muborak bo‘lsin!