АВФ…

Сўнги умид... Дарахт шохларида омонатгина осилиб турган ёлғиз хазон япроғига ўхшайди...
Ҳатто шу қуш ҳам озод, эркин, исталган томонига уча олади. Панжаралар ортида умрини ўтказаётганлардан-да ўша қуш бахтлироқ... Улар қиш ўртасида ҳам дарахт шохларини тарк этмаган япроққа ўхшайди. Умид бор... Ишонч бор... Кун келиб албатта озодликка чиқади, қадрдон оиласи бағрига қайтади. Чунки уларнинг аксарияти хатосини, қилган иши жиноят эканлигини аллақачон тушуниб етган. 
    Улар ҳар куни  Ўзбекистон Республикаси Президентининг "Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни авф этиш тўғрисида”ги Фармонини имзолашини кутишади. Мазкур ҳужжат иловасида рўйхатдан ўзларининг исм-фамилиясини умид билан излашади.
    Ҳа...Озодлик шундай буюк неъмат. Баъзида инсонлар қўл ураётган ноқонуний ҳатти-ҳаракати учун жавобгарлик борлиги, бунинг учун темир бетонлар ортига равона бўлиши мумкинлигини билишса-да, жиноят йўлидан қайтмайди. Кимдир билиб, бошқа биров эса билмасдан боши берк кўчага кириб қолади. Аслида хато қилган эмас, уни ўз вақтида англаб етмаган, тўғирлашга ҳаракат қилмаган киши хатокордир. ЖИЭМларида қилмиши учун жазо муддатини ўтаётган шахслар билан олиб борилаётган маънавий-маърифий ишлар, китобхонлик тадбирлари уларни тўғри йўлга қайтаришга ёрдам беради. Мақсад жиноятга қўл урганларни жазолаш эмас, уларни қайта тарбиялаб ижтимоий ҳаётга қайтариш, жамиятда яна ўз ўрнини топишга, ҳалол меҳнат қилиб, оиласига бош бўлишга кўмаклашишдан иборат. Ана шундай инсонпарварлик тамойили асосида олиб борилаётган амалий ишларнинг давоми сифатида давлатимиз раҳбарининг "Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни авф этиш тўғрисида”ги Фармони ана шундай пушаймонлик ўтида ёнаётган, виждон азобида қийналаётган, имконият берилса, ҳаётини фақат эзгу ишларга бағишлашни ният қилаётган бир гуруҳ шахсларга чексиз бахтни ҳадя этди. 
Навбаҳор тумани "Тошработ” МФЙда яшовчи Шаҳодат Нуралиеванинг кўзларини тарк этган қувонч, юзига 13 йил бегона бўлган табассум бугун қайтди.  Уни ўзи билан олиб кетган ўғли Насим Нуралиев  узоқ йилдан сўнг яна қайтарди. Фарзандининг бахтидан порлаган кўзлар, дилбанди бағрида эканидан хотиржам нигоҳлар...13 йилааа... Эҳҳҳ... Жигарбандини бир кун кутишнинг ўзиёқ онани адойи тамом қилиши фарзандлар билганида эди... 
Инсон қадри улуғланган юртимизда ҳеч бир шахс эътибордан четда қолмайди. Насим Нуралиев жазо муддатини ўташ чоғида унинг оиласига қанчалик ғамхўрлик қилинган бўлса, ўз навбатида оила аъзолари ҳам жамиятнинг фаол иштирокчиси эканини намоён этишди. Яъни фарзандлари ва рафиқаси ҳудудда ўтказилган "Китобхон оила” танловида иштирок этиб, фахрли биринчи ўринни қўлга киритди. Бугун ҳам вилоят ва туман мутасаддилари хонадонга бориб, суҳбат ўтказиб, жоиз бўлса ижтимоий ёрдам беришини айтишди. 
Муҳими ўзида меҳнат қилишга иштиёқ бор. Келажакка умид ва ишон йўқолмаган. Ахир 13 йил оила бағридан, озодликдан маҳрум яшашнинг ўзи бўлмайди. 
Ортда қолган 13 йил... Энди бу ҳовлининг дарвозаси шом тушмасдан ёпилмайди. Онаизор ғамгин нигоҳи ила ёпиқ дарвозага термулмайди. Энди у доимо очиқ... Ўз эгасини, оила бошини кутади. 
    Ҳар бир аёл умр йўлдоши ёнида бўлишини, ҳар бир фарзанд отасининг бағрида улғайишини, ҳар бир ота-она кексайганда фарзанди камолини кўришни орзу қилади. Аслида дунёда ҳеч бир хазина эвазига топилмайдиган бахт ҳам ана шу... Уни ўз қўлларингиз билан хазонга айлантирманг.
АВФ…
АВФ…
АВФ…
АВФ…
АВФ…
АВФ…

Агарда Сиз мақолада хатони учратган бўлсангиз, унда хато матнни белгилаб, CTRL + ENTER тугмасини босинг ва сайт маъмурига хабарнома жўнатинг.