Бугун юртимизнинг қайси бир гўшасида бўлманг, инсон қалбида чексиз ғурур ва ифтихор бағишловчи энг улуғ ва энг азиз айёмимиз Истиқлол шукуҳи халқимиз онгу шуурида тантана қилаётганига гувоҳ бўласиз.
Ана шундай тантаналардан бири 28 август куни Набаҳор туманидаги Марказий ўйингоҳда бўлиб ўтди. Байрамда туман Маданият ва спорт ишлар бўлими томонидан тайёрланган концерт дастури намойиш этилди.
Барчамизга кундек равшанки, 23 йил тарих учун олис вақт эмас. Бироқ, ўтган давр мобайнида Муҳтарам Юртбошимиз Ислом Абдуғаниевич Каримов томонидан юртимиз равнақи, халқимиз фаровонлиги йўлида мисли кўрилмаган асрларга татигулик ишлар амалга оширилдики, бугун бу ҳақиқатни ҳар бир жабҳада ҳаётнинг ўзи исботлаб турибди.
Шуни қувонч билан айтиш мумкинки, ҳуқуқий демократик жамият сари илдам қадам қўйган юртимизда инсон шаъни, унинг қадр-қиммати ва манфаатлари олий қадрият ҳисобланиб, бу фалсафа ҳар куни, ҳар лаҳза хусусан, байрам ва халқ сайлларида янада кенг қулоч ёзмоқда.
Байрам муносабати билан мутасадди корхона ва ташкилотлар томонидан якка ёлғиз, боқувчисини йўқотган оилалар ҳолидан хабар олиниб, бир қатор эҳтиёжманд оилалар фарзандларининг суннат тўйлари ўтказилиб берилди.
Мустақиллигимизнинг бу йилги шонли санаси муҳтарам Юртбошимиз Қарорига асосан “Ягонасан, муқаддас ватаним, севги ва садоқатим сенга бахшида, гўзал Ўзбекистоним!” шиори остида нишонланаётгани халқимизнинг жонажон диёримиз ҳурлигига бўлган юксак ишончи ва муҳаббати белгисидир. Бу эса ҳеч бир давлат, ҳеч бир миллатда учрамайдиган ўзига хос қадрият, халқимизга хос бағрикенглик намунасидир.